diumenge, 6 de febrer de 2011

Aumenatge au gran sonaire breton Yannick Martin e solidaritat de cara a la coneria.

Yannick Martin qu'ei breton.
Yannick Martin n'ei pas un simple breton, qu'ei sonaire. Que hè soar los instruments de vent bretons com la bombarda e lo binioù kozh (la petita cornamusa bretona).
Yannick Martin qu'ei un sonaire breton deu bon. Que hè partida deu Bagad Kemper.
Yannick Martin n'ei pas sonque un simple sonaire en demiei d'autes sonaires bretons deus bons: qu'ei estat dus còps campion de Bretanha. Que's guanhè los campionats deus sonaires de Bretanha en 2009 e en 2010 dens la categoria bombarda-binioù bras (dab Daniel Moign au binioù bras, la cornamusa grana d'origina escocesa, e Yannick a la bombarda).
Yannick Martin qu'a un hrair besson qu'ei tanben sonaire e qui's ditz Tangui Josset. Que jogan sovent amassa e ensems qu'an guanhat mes d'un concors dens la categoria bombarda - binioù kozh. La rason qui hè que Yannick e Tangui n'an pas lo medish nom qu'ei pr'amor qu'estón adoptats per familhas bretonas distintas. Los gojats que son originaris de l'America deu Sud. E que son de pèth negra.

La color de la pèth deu campion deus sonaires que'u való comentaris injuriós e despreciatius de part de fanatics qui'us an publicats en la plana web d'ua organizacion bretona nacionalista d'extrèma dreta.

Lo gojat, de 24 ans d'edat, qu'agó de denonciar aquesta hèita racista en comissariat la setmana passada.

Alavetz, aquiu, jo que voi felicitar Yannick Martin peu son art e las recompensas plan merescudas qu'obtienó, e exprimir la mea solidaritat totau dab aqueth musicaire talentuós qui s'ei hicat au servici de la tradicion musicau bretona.

En la video qui segueish, que i vedem los campions Yannick Martin e Daniel Moign:

E en aquesta, que i vedem los hrairs Yannick Martin (binioù kozh) e Tangui Josset (bombarda) acompanhats per l'acordeonista Thomas Moisson e lo bassista Thelo Mel:

3 comentaris:

Mela ha dit...

Welcome back!

òsca pel pòst! òsca als musicaires! E NON a la conariá racista.


( mais putain que c'est chiant la musique bretonne)

Salvador ha dit...

Ben tornat, Joan.

Certament no hi ha res més miserable que el racisme.

manjacostel ha dit...

Son bons los tipes... Cal èsse con per pas ausir...e escotar.