Cap deth món o centre deth món?

Ja escriguí qu'eth mèn país tenguie coma espiada era cadea des Pirenèus. Eth mèn pais comence en bèth lòc entre eth pòle nòrd e es Pirinèus, e s'acabe en bèth lòc entre eth pòle sud e es Pirenèus. O dilhèu serà eth revèrs, qui sap? En tot cas, se non sai ben ben a on comence e a on s'acabe eth mèn pais, ua causa ei segura: en bèth miei que i son es Pirenèus.

Alavetz, quan liegi en un abans-díder d'un libre sus eth gascon de Barètge qu'aguest parçan, eth país tòi, en vessant nòrd des Pirenèus, ei un "finisterre" (!), me digui qu'eth tipe qui poguec escríuer ua bestiesa atau deu èster encara un d'aguesti franchimands estreti d'esperit, incapables de concéber qu'eth món non s'acabe damb es frontères der exagòn.

E ben non. Suspresa (o cap tant): aguest tipe qui semble confòner es païsi deth Naut-Pirenèu gascon damb Bretanha o Galícia ei lingüista e ensenhe er occitan ena universitat deth Miralh en Tolosa. E ei occitanista. Non ei d'expression gascona, notaratz. A mès a mès, i escriu qu'eth gascon ei un occitan un shinhau estranh, çò que non ei cap vertat. Un occitan estranh ei precisaments un occitan que non ei gascon, toti qu'ac sabem plan. Tot ei ua question de punt de vista e de referéncies, ce me dideratz, e a jo me semble evident qu'es mies non son cap exactaments compartides damb aguest professor d'universitat.

Nosati non auem de besonh de demorar qu'es montanhes s'abaishen tà saber qu' eth món- e mès precisaments eth món nòste- contunhe de cap tath sud, ben ath delà dera linha dera cresta pirenenca, entà acabar-se en bèth lòc entre montanha e pòle sud. Es Pirenèus non son e non son cap jamès estadi eth cap deth món.