dimecres, 29 d’abril del 2009

Quinzau baishada deu riu Zinca en navatas


L'amic Zagal de Molinero L'Arco, gran navatèr davant l'Eternau, que'ns convida a participar a la hèsta a l'entorn de la baishada deu riu Zinca, qui's debanarà la dimenjada deu 23-24 de mai d'enguan, enter Laspuña e Ainsa, en Sobrabre.
Ua navata qu'ei ua sòrta de radèu emplegat coma mijan tradicionau (despuish lo sègle XVI) de transportar los troncs d'arbres de cap tà las seguerias de la region en tot utilizar los rius de la montanha deu Haut-Aragon coma camin. Autes còps, que podèvan baishar atau dinc a Tortosa.



Adara, tà transportar la lenha, las navatas que son estadas plan segur remplaçadas per camions e los rius non son pas mes utilizats. Mès la navateria que continua coma activitat ludica e esportiva.

Qu'ètz convidats a participar a las hèstas deus navatèrs, la dimenjada deu 23-24 de mai. Lo programa qu'ei lo seguent:

Dissabte 23 de mai:
Activitats ludicas tradicionaus en riu
Mesa a l'aiga de las navatas
Sopar en Laspuña (las entressenhas peu menu e la reservacion, que las trobaratz aquiu.
Concèrt de la Ronda de Boltaña


Pasa la ronda - La Ronda de Boltaña

Dimenge 24 de mai:
9:30 Dejunar a la plaja (Camalhon (cambajon), hromatge e sardinas)
11:00 Debuta de la baishada.

Vengatz nombrós, que i ètz tots esperats!!!!

diumenge, 19 d’abril del 2009

En vacanças (seguida)

Mes cançons deus Dubliners, un grop fondat en...1962, e uei lo dia tostemp popular. Deus membres originaus deu grop, sonque Barney McKenna i ei enqüèra.

Dirty Old town qu'ei ua cançon compausada peu militant e activista britanic James Henry Miller, alias Ewan MacColl (1915-1989). Aquera cançon qu'ei ua favorita de la mea hilha, qui la coneish per The Pogues (que n'ei fan).



La version per The Pogues (causida per la hilha, mercés a era). Avetz dit dentista?



Un aute "hit" deus Dubliners tanben représ peus Pogues: the Irish Rover


La medeisha cantada amassa dab los Pogues. Que i vedem lo fondator deus Dubliners, lo regretat Ronnie Drew (1934-2008), que i canta coma líder en alternància dab Shane Mac Gowan (deus Pogues):


Totun, la mea version preferrida qu'ei la deus hrairs Clancy e de Tommy Makem:



Whiskey in the Jar qu'ei un tradicionau irlandés, popularizat en ço deu Peiroton peus hrairs Clancy e Tommy Makem


La version deu regretat Tommy Makem (1932-2007):



A lèu!

dissabte, 18 d’abril del 2009

En vacanças

Com ac avetz podut remarcar, lo blòg que s'ei hicat en repaus. Que demorarà silenciós enqüèra drin de temps, ua bona setmana aumens, mès que m'i tornarèi hicar, promés.
Vam, que'vs deishi dab lo vielh banjoista deus Dubliners, Barney McKenna, dens ua video enregistrada en 1970. Que comença dab un aire lent e continua dab ua seguida de reels. Doncas, d'escotar dinc a la fin! Barney McKenna que contribuí a popularizar l'emplec deu banjo tenor dens la musica irlandesa, abans qu'aqueste intrument cedisca lo pas au bozoqui version irlandesa, dens las annadas 70.


dilluns, 6 d’abril del 2009

Lo 4 d'abriu 2009, qu'èram un bon milierat a manifestar a Pau

Lo 4 d'abriu 2009, que manifestèm a Pau per la lengua. Que seguim las arrecomandacions de la crida. Que trobaratz mes fòtos de la manif ací.

A quatorze òras que debutè l'aplec a la plaça de la Liberacion.








Qu'èra l'ocasion de's hèr la fòto de pès dab personalitats com la Mela de Sabatons Jaunes e lo Camel.