dimarts, 3 de juny de 2014

Navèra mapa de las regions: decepcion

Dongas, lo president François Hollande qu’a presentat lo son projècte de mapa navèra de las regions de França.

 Com d’auts, qu’avi saunejat a l’oportunitat auherida per aquera revision administrativa, de reunir tots los país gascons laguens ua soleta entitat administrativa en bèth fusionar Aquitània e Mieijorn-Pirenèus. Que signèi la peticion en aqueth sens. Lo projècte presidenciau qu’ei diferent. Que lo Baish e lo Haut Lengadòcs e’s tròben reunits dab la fusion de Mieijorn-Pirenèus dab Lengadòc Rosselhon, aquò que’m sembla plan. Los gascons n’an pas avut aquera sòrta. La partida gascona de Mieijorn-Pirenèus que’s trobarà diluida laguens un gran ensemble occitan majoritàriament lengadocian. E, çò de sordeish, ua frontèra administrativa que continuaré de dividir Armanhac en dus tròç, de separar la Gasconha landesa de la Gasconha interiora e Bigòrra de Bearn. Lo maine lingüistic gascon que demoraré dividit. Que haré dòu, que tròbi jo.

Non sèi pas se i a enqüèra quauques possibilitats d'obtiéner la fusion d' Aquitània dab la region Mieijorn-Pirenèus(la de uei o, miélher, la deu futur, mei grana). Se non, que poderam sajar de nse consolar en imaginar la cultura gascona que poderà continuar d’arrecéber subvencions de duas regions en lòc de juste ua. Pòca consolacion, la vertat.

2 comentaris:

Anònim ha dit...

Òmi, se tu tanben ès gascon (e que crei que n'ès), qu'as a escríver "Los gascons n'avem pas avut aquera sòrta".

Joan de Peiroton ha dit...

Que soi d'acòrd. Totun, e soi gascon? De pair orleanés, de mair parisenca, neishut a París on viscoi dinc a l'atge de 23 ans, puish que viscoi dètz ans a Estraborg, puish 27 ans a Tolosa qui soi a deishar tà Catalonha (la deu nòrd). E soi gascon? Gasconofòne, d'acòrd, totun gascon, de còr en tot cas, shens arrenegar arren de la mea identitat pregona.