dijous, 8 de setembre del 2011

Pausa utila

Que soi estat embauchat per l'Eric Gonzalès entà participar a un tribalh collectiu de lexicografia gascona, prumèra etapa de cap tà un diccionari tot en gascon qui sia lo mes complet possible. Lo gran Pèir Morà (que'u dedicarí la plaça principau de la vila se pogossi)  que ns'a amuishat lo camin de seguir, que i vam.
Que cau arrestar la peleja ideologica esterila sus la classificacion deu gascon. N'ei pas la classificacion çò qui impòrta. Lo reng deu gascon n'a pas de depéner d'ua classificacion quina que sia. Prengam lo cas deu francés. Que lo francés sia considerat o non com un dialècte de la lengua d'oil o com ua lengua a despart, quina importància aquò pòt aver? Tot lo monde se'n fot!  Dab rason.

Hicar lo gascon a un medish nivèu que lo deu francés qu'ei l'objectiu.

N'i a qui disen lo gascon qu'ei ua lengua mòrta pr'amor que n'ei pas mes transmés. Jo que tròbi aqueth brave monde qu'entèrran lo gascon un pòc viste.   Que soi segur que moriram, eths com jo, abans que non pas lo gascon. E aquò n'ei pas ua rason entà díser qu'èm dejà mòrts. Non soi pas pressat. Lo gascon tanpòc.

En tot cas, botar la mia energia e lo men léser au servici de la lengua qu'ei quauquarren qui'm  platz. Que sajarèi de contunhar d' i botar quauques linhas, en aqueth blòg, totun que sapiatz que soi a tribalhar tà la collectivitat e aquò que's harà au despens deu blòg.

Adonc, dinc a las purmèras!

3 comentaris:

lomahon ha dit...

Uros que soi que lo men tribalh avossi per efèit d'aviar un balanç navèth. Totas las insuficíenças, las pècas solide, lo vocabulari de manca, qu'an besonh d'un tribalh pregon. Tot la problèma qu'es en delà deu balanç navèth, qu'es d'encaminar dinc au cap un tau prètzhèit. Osca a la Gran Enciclopedia Gascona!
Pèir Morà

Anònim ha dit...

Òsca dab lo Gonzalès com director lexicograf de l'occitan gascon, excusa, deu gascon !

Asier G. ha dit...

Granas naveras!
Coratge!