divendres, 15 de gener de 2010

Vèrbes e vèrbes

Que supausi hèra d'enter vos que coneishetz lo libe "lo vèrb occitan, guida completa de conjugason" escriut per P. Sauzet e J. Ubaud e pareishut aus edicions Edisud. Aqueth libe, malaurosament esgotat, qu'ei hèra plan hèit. Que compren un lexic de 13000 vèrbes, e que s'i ensenha de man(i)èra hèra clara quin e cau conjugà'us en lengadocian. N'avem pas nat equivalent en gascon e qu'ei plan daumatge, per'mor las gramaticas gasconas non son pas tostemp explicitas o completas suu subjècte de las conjugasons deus vèrbes. La mea gramatica de referéncia " Gramatica de l'occitan gascon contemporanèu" de Romieu e Bianchi (Presse Universitaire de Bordeaux) qu'ei d'emplec complicat per çò qui tanh aus vèrbes. Qu'ei mauaisit de trobar quin e cau conjugar tau o tau vèrbe, e quauques exemples verbaus son estats simplament oblidats. Lo mèste Andriu Bianchi que'm digó que'n pensavan hargar ua dusau edicion. Espèri qu'ac haràn en tot corregir los exemples aranés e que'n profietaràn tà completar la lista deus vèrbes. Que i caleré tanben arrevisar completament l'index tà'u hèr mes complet e mes practic. Bon, non voi pas que pensetz la gramatica de Romieu e Bianchi non m'agrada pas. Au contra, que m'agrada e que m'ei indispensabla. Que pateish sonque de quauques errors de joenessa, e que'm tarda de'n poder crompar la segon(d)a edicion.

2 comentaris:

優次 (Yuji) ha dit...

Bon, supausi que ja coneishes aguesti libes, mès en tot cas... ;)
Entath aranés que i a un libe que's ditz "Es vèrbs conjugadi", e inclodís tanben es conjugasons de Canejan e Bausen.
Autament, que i a un libe de Per Noste que inclodís eths conjugasons deths diferenti parçans de Gasconha, mès aguest encara non sabi cap quin ei (que hè un mes que demori un paquetàs de Per Noste e eth correu qu'ei fòrça lent en aguesta època deth an).

parpalhon ha dit...

lo libe de conjugasons de Per Noste es hèra plan .. en tot cas a jo que'm servís hèra ende conjugar en armanhaqués ;)