A L'Espuga, en Comenge, qu'avem tanben ua dauna de prepausar tau drapèu

Finaument, se volem hicar ua dauna enqüèra mes vielha suu drapèu de la Gasconha Grana, qu'ac podem hèr, ja qu'a L'Espuga, en Comenge qui ei tanben un país gascon, que n'avem ua de plan polida. Remarcatz, n'ei pas reaument deu medish estile que la de Brassempoi, aquesta. La dauna de L'Espuga que data d'enter -26 000 e - 24 000 abans JC. Era qu'ei tanben hèita d'ivòri de mamot, mesura 15 cm de hautor.
Que hè un chic mens intellectuau que la de Brassempoi. Totun, non manca pas d'arguments, ce'm sembla. Qu'estó mutilada accidentaument au moment de la soa descoberta, praubeta. Mès bon, qu'an podut tornar ac hicar tot en plaça, gràcias a un pòc de cirurgia estetica.



Constataratz, en mirant lo darrèr de la dauna - enfin, voi díser l'esquia e lo cap, la meitat hauta, qué!- que los peluquèrs e sabèvan tribalhar coma cau, tant a l'epoca de L'Espuga com a la de Brassempoi:



Bon, tau drapèu, qué hèm, finaument ? E'ns cau organizar ua votacion navèra?

Pensi que demoraram dab la dauna de Brassempoi suu drapèu. Totun, la de L'Espuga que m'agrada tanben. 27 000 ans a, que n'i avèva dejà artistas deus bons per nostas tèrras.

País Gascons, ua lenga, un drapèu !

Ua lenga, un drapèu tà la Gasconha Grana:



Coma drapèu taus país gascons, qu'avèvam dejà adoptat lo doble triangle roge e blanc bèth temps a, gessit de las reflexions deus Gascons de la web Gasconha.com e causit per ua votacion a la majoritat. La part roja que representa lo territòri de lenga gascona, de fòrma triangulara com ac sabetz. Ara lo Conservatòri deu Patrimòni de Gasconha que'ns prepausa d'i hicar la dauna de Brassempoi. A jo, aquera escultura que m'agrada hèra e qu'èi adoptat aquera version deu drapèu sens esitar ua segonda.


Brassempoi qu'ei un vilatge de Chalòssa (Lanas) on e's hasó la descoberta d'aquesta escultura de cara de dauna, un cap d'òbra d'ivòri qui data de 23 000 ans, haut o baish. Las dimensions de l'òbra son petitonas (sonque 3,5 cm de hautor) e la dauna devèva estar muda, ja que la mancava la boca...Totun, n'ei pas ua rason tà non pas parlar la lenga nosta!!!