Occitan oficial e virginal

La setmana passada o la d’abans, a las actualitats, i aguèt un grand reportatge sus las amenaças telefonicas de bomba a Lorda, sai pas se l’agachèretz. En tot cas, poguèrem ausir un detalh tras qu’interessant revelat pel jornalista: l'anonim aviá l'accent mediterranenc. Me demandi de quin accent se pòt tractar aquí. Lo d'Izzo, lo de Montalbán, o lo del sicilian Camilleri? Una enquèsta nòva se fa de besonh, Agent K! Ja la tenètz , vòstra nòva mission, lo país compta sus vos. Soi segur que capitaretz coma pels còps d'abans. Avètz totjorn capitat. Sètz nòstre melhor element, aprèp tot. E lo sol disponible en aqueste fotut mes d’agost. Alara, avètz pas la causida: cal capitar. E cap de borra, e ! Defòra la borra, vos cal demorar seriosa. Enfin, levat s’aquò es necessari per l’enquèsta. Sa santetat Beneset 16 vos perdonarà. E vos doblidètz pas de vos portar un diccionari de gascon per s’en cas avètz l’escasença d’interrogar la Santa Verge. Ne deu saber de causas, la Maire de Dieu! Mas parla pas sonqu’aranés o quicòm pròche, e amb un accent mediterranenc, encara. Lo darrièr còp qu’una de nòstres agents la poguèt interrogar, l’Agent BS, vos rapelatz pas ? bon, segur, fa un bèl brieu, e! Enfin, en tot cas, pas degun comprenguèt çò que voliá dire, la Maire de Dieu. Tot çò que foguèrem capables de notar foguèt : Que sòi era immaculada concepcion! Quina mena de dialècte es aquò? L'an pas educada al CAÒC, la Santa Verge! Probable un agent dels Araneses, aquestes fotuts messorguièrs qui claman pertot que l’occitan estandard existís pas ! L’aranés, aquò servís a pas res en defòra de la Val d’Aran, tot lo mond o sap plan. Enfin, levat a discutir amb la Maire de Dieu, segur, mas aquò, tot lo mond se’n fot. O puslèu, se’n fotiá. Per çò qu’ara, la cal interrogar, la Maire de Dieu! E doncas, l’occitan oficial e mai virginal, lo cal plan aprene. I escaparem pas. Alara, escotatz-me de plan, Agent K : trobaretz çai-jonch un metòde d’aranés, un present generosament ofèrt per un brave catalan, l’Excellentíssim Senyor Galdric Tarriga i Grullol. Bon, soi d’acòrdi, es pas nòu nòu, son metòde, mas se vei plan qu’a pas degut tròp servir. Anèm, ne moriretz pas ! E doblidètz pas: lo país compta sus vos.