Eth nòste amic Ferriòl der ADOC que mos prepausèc encara informacions en aranés a trauèrs der emission der Infòc de Barcelona TV, que vos podem mostrar acitau gràcies ar amic Yuji coma de costum. Ara fin deth video, que i poiratz escotar era version aranesa de "Haut Peiròt" cantada pes mainatges deth casal d'estiu de Bossòst "Era Viroleta"...Notaratz qu'en Ferriòl use fòrça der enonciatiu gascon "que", que es aranesi utilizen ben pòc ath dia d' aué per males influénces des autes lengües romanes parlades en Aran. Coma mos ac hèc arremarcar er arregretat Joan Coromines, er enonciatiu gascon que hè ben part dera lengua aranesa, e que lo caldrie tornar a emplegar mes soent segons es conselhs d'Aitor Carrera, professor d'occitan ar universitat de Lhèida e autor d'ua gramatica aranesa.
De seguida, aquiu qu'auetz era version originau de Haut Peiròt peth grup Nadau. La video qu'ei sostitolada en gascon e en anglés per AnPrionsaBeag (go raibh maith acu :D!). Era version anglesa non ei cap totafèt exacta, qu'ei meslèu ua adaptacion que non ua virada exacta, mès bon...que da ua idèa dera letra tàs qui saben era lengua de Shakespeares sense saber era nòsta.
E entà acabar eth messatge d'aué, qu'è trapat un aute video d'un concèrt que eth madeish grup Nadau dèc en Auloron (Bearn). Ailàs, que i mòstren sonque trocets petiti des cançons. Tà veir aguest video, que vos sufís de clicar acitau.
5 comentaris:
seriás pas un pauc fan de nadau tu???
E's nòta tant ???? lol
Adieu Joan! Soi AnPrionsaBeag. Plan mercés pel ligam. La revirada qu'ai facha d'aquesta cançon tan bonica coma pertocanta per nosautres occitans, es coma l'as dich mai una adaptacion qu'una revirada ric a ric. Qu'ai volgut servar lo costat cantadís (e mai magic!) de las paraulas, qu'una revirada pus literala me permetiá pas gaire. Perqué l'anglés? Per que lo mai de monde possible pòsca comprene nòstra cultura e la situacion del País dins un Estat que l'ignòra sens vergonha dempuèi gaireben uèch cents annadas. En mai, ai creat un article sus la wikipèdia parlanglesa, se vòls corregir ma revirada. Fe sempre, amic!
Adiu AnPrionsaBeag! N'ei aprofieitat tà corregir lo ton pseudo, e i botar lo ligam plan com cau! Mila excusas! Ara qu'ei hèit.
Publica un comentari a l'entrada