dimecres, 1 d’octubre del 2008

Au país de Catinou, la vita es pas totjorn aisida endeus qui vòlen parlar la lenga

Qu'èi lejut suu blòg deu País de Catinou, en gascon tolosan, çò qui segueish:

Au Sénher Borís VIVEN

Respónder a la letra deu Sénher Borís Viven, adjunt au maire de Sent Lis, demanda tot escàs la presentacion deus fèits. La nòsta responsa es pas la d’un partit o d’una persona. La Catinou, la lenga occitana son de totes. Son le nòste patrimòni, coma ac pòt èster la hala. La nòsta constitucion, dempèi la siva modificacion deu 21 de julhet darrèr, ç’ac ditz : « Las lengas regionalas apartenguen au patrimòni de la França » (Art. 75-1).

Sr. B. Viven es çampar estacat a-n-aqueste patrimòni, çaquelà es le tanhent d’una equipa muncipala qu’a la politica que seguís :

· Retrèit una banderòla anonçant « Dimenge 5 d’octòbre Hèsta de la CATINOU » peus agents de la direccion de las rotas departementalas a partir deu senhalament hèit per la municipalitat (23/09/08).

· Interdiction estèc hèita au personau de la mairia de prénguer inscripcions ende las diferentas manifestacions de la CATINOU.

· Pas de sala ende hèr les corses d’occitan organizats per l’associacion CATINOU, L’ensenhant d’occitan a totjorn pas recebut de responsa escriuta au siu corrièr. La siva demanda a la municipalité èra d’aver, coma avant, una sala ende hèr les sius corses d’occitan a la populacion.

· Arrèst totau de la senhalizacion bilingua francés / occitan començada en 2006. Dempèi aquera data les mainatges de la seccion bilingua inauguravan placas deu nom de la via o carrèras. Una lenga que s’escriu pas, que se mòstra, existís pas. Ajudar l’ensenhament bilingüe es naturalement contunhar aquera politica d’un occitan veseder.

· Mauconeishença e opausicion a l’ensenhament de l’occitan quand Sr. B. VIVEN declara que : « la vila de Sent Lis hasquèc la causida de manténguer las seccions bilinguas francés/occitan… » Sr. B. VIVEN desconeish que l’ensenhament bilingüe depen de l’Educacion Nacionala e pas de la municipalitat (véser circulara n° 2001-167 deu 5-9-2001). La municipalitat s’ocupa deus bastiments e l’Estat de l’ensenhament (véser leis escolaras de 1881 e 1883). Es de notar que la municipalitat de Sent Lis estèc convidada a donar le siu avís sus la creacion de la seccion bilingua en decembre de 2001. Totes les conselhèrs municipaus de l’equipa deu Sr. B. VIven votèren en contra.

· Interdiccion de la hala ende la hèsta de la Catinou es plan confirmada per l’arrestat municipau n°137 en data deu 21 de julhet de 2008. Aqueth arrestat, que s’adreça à l’associacion Catinou e Jacouti, estipula dins le siu Art. 3: « la hala serà barrada au public ». Es plan signada peu maire actuau, Sr. Jacques Tène. Hasquèc pas l’objècte de nada concertacion, ni informacion prealabla a l’associacion.
-------------------------------------------
Evidentament, lo vòste servidor se solidariza completament dab los amics de Catinou. Vergonha, Sénher Viven !!!!

Tà vse'n assabentar mes, que'vs cau léger los messatges deu blòg deu País de Catinou. Que hè dòu de non pas i poder hicar comentaris tà i exprimir la soa solidaritat e los sons encoratjaments. Doncas, jo qu'ac hèi aquiu.

1 comentari:

Unknown ha dit...

Viven qu'ei un nom occitan, non pas gascon senon lengadocian. Que cau
que los occitanistas e's demanden çò qui entraina gents deu país ad
opausà's ad eths. Ne seré pas l'arrogància, lo créder qu'ua causa
nòbla e'us dispensaré de devisar e convéncer ?