Lo viatge del Pol

Aquiu un conte de la termièra de Gasconha, en lengadocian aqueth, qui'ns rapèra que'ns cau tostemp nes menshidar deu cuu deu poth (hasan, galh).
------------------------------------------------------
Jo sabi un conte.

I avià, un còp, un pol que trobèt una borsa plena d’òr.


- Cocorocò ! Ma fortuna es fèita. Anem ribotar a la fièra.

Lo pol partisquèt. Al cap d’una lèga, trobèt un vòl de moscas.

- Adiu, Pol. E ont vas ?

- Moscas, vau ribotar a la fièra.

- Pol, seriás plan onèste de nos convidar.

- Moscas, vos convidi ambe plaser. Mès me poiretz seguir ?

- Pol, te seguirem.

Lo Pol tornèt partir. Las moscas lo seguián en bronzinant.

Una lèga plus luènh, las moscas ne podián pas plus.

- Pol, sèm arrandudas.

- Moscas, dintratz dins mon cul. Vos portarèi.

Las moscas dintrèron dins lo cul del Pol, e tornèt partir.

Una lèga plus luenh, trobèt un eissam de fissalhons.

- Adiu, Pol. E ont vas ?

- Fissalhons, vau ribotar a la fièra.

- Pol, seriás plan onèste de nos convidar.

- Fissalhons, vos convidi ambe plaser. Mès me poiretz seguir ?

- Pol, te seguirem.

Lo Pol tornèt partir. Los fissalhons lo seguián en rondinant..

Una lèga plus luènh, los fissalhons ne podián pas plus.

- Pol, sèm arranduts.

- Fissalhons, dintratz dins mon cul. Vos portarèi.

Los fissalhons dintrèron dins lo cul del Pol, e tornèt partir.

Una lèga plus luènh, trobèt un tropèl d'ases.

- Adiu, Pol. E ont vas ?

- Ases, vau ribotar a la fièra.

- Pol, seriás plan onèste de nos convidar.

- Ases, vos convidi ambe plaser. Mès me poiretz seguir ?

- Pol, te seguirem.

Lo Pol tornèt partir. Los ases lo seguián en bramant..

Una lèga plus luènh, los ases ne podián pas plus.

- Pol, sèm arranduts.

- Ases, dintratz dins mon cul. Vos portarèi.

Los ases dintrèron dins lo cul del Pol, e tornèt partir.


Una lèga plus luènh, trobèt un tropèl de buèus.

- Adiu, Pol. E ont vas ?

- Buèus, vau ribotar a la fièra.

- Pol, seriás plan onèste de nos convidar.

- Buèus, vos convidi ambe plaser. Mès me poiretz seguir ?

- Pol, te seguirem.

Lo Pol tornèt partir. Los buèus lo seguián en bruglant..

Una lèga plus luènh, los buèus ne podián pas plus.

- Pol, sèm arranduts.

- Buèus, dintratz dins mon cul. Vos portarèi.

Los buèus dintrèron dins lo cul del Pol, e tornèt partir.

Una lèga plus luènh, arribèt, la borsa al bèc, dins un grand castèl.

- Bonsera Monsur, Bonsera Madama. Crèbi de set e de fam, e soi las de portar tot çò qu'èi dins lo cul. Donatz-me lo sopar e la cochada, se vos platz.

- Pol, passa ton camin. I a pas res ací per tu.

- Monsur, Madama, èi de que vos pagar. Vejatz puslèu aquesta borsa plena de loïs d'òr.

- A ! gus. A! brigand. Aquesta borsa es nòstra. Venes de nos la panar.

- Non pas cèrtas.

- Atend! volur. Atend!

Mèstres e vailets corrián al darrèr del Pol, per li prene sa borsa.

Que fasquèt alavetz lo brave animal? Caguèt tot çò qu'aviá dins lo cul.

Las moscas fasián: "Rrr rrr rrr"
Los fissalhons fasián:"Brr brr brr"
Los ases fasián: "Hihà! Hihà! Hihà!"
Los buèus fasián: "Mòu! Mòu! Mòu!"

An aquel tapatge, los mèstres e los vailets, espaventats, descampèron al grand galòp, coma s'aviàn avut tots los Diables d'infèrn a sas trossas. Atal, lo Pol e sos amics demorèron mèstres del castèl, ont visquèron longtemps, riches e urós (1).

E cric, crac,
mon conte es finit,
E cric, crac,
mon conte es acabat.
Passi per mon prat,
ambe una culhèra de favas que m'an donat.

Joan-Francés Bladèr - Contes de Gasconha, darrèra garba.

(1) Dictat per Anna Deumàs, deu Passatge d'Agen (L.-e G.)